Ideja “brilante” se duke kryer apklimet online dhe më pas përgjigjet të vinin po online për shërbimet në Kadastër do ulnin korrupsionin, ka dështuar që në ngjizje. Përkundrazi, situata është edhe më katastrofike se më parë, kur ishin hapur zyrat e “ADISA”, që shërbenin si për aplikimet ashtu edhe për ankesa dhe kërkesa të qytetarëve nëse përgjigjet nuk vinin sipas kërkesave të tyre.

Mijëra qytetarë e kanë provuar mbi shpinë batërdinë me vonesat dhe çoroditjen e tmerrshme në sistemin kadastral përgjatë muajve korrik-gusht. Nën pretekstin se po instalonin një sistem të ri digjitalizimi të shërbimit tërësisht online, qytetarët kanë prritur dhe po presin me muaj të tërë pa mbaruar punë. Tërësisht të kundërtën pretendon Rama, madje i bën aq budallej hallezhinjtë që e vuajtën vetë këtë tmerr kadastral sa po përpiqet të thotë se ju mijëra qytetarë ja fusni kot, se sistemi është i shpejtë, i saktë dhe s’ka më korrupsion.

“Ndërkohë që po, e vërtetë, s’funksionon më sistemi i vjetër, zhbëhet përditë rrjeti i sekserëve, influencave të llojllojshme, buburrecave e minjve brenda kadastrës, të cilët vazhdojnë të dorëhiqen prej tharjes së burimeve të pista, vazhdon papushim puna për përmirësimin dhe rritjen e efiçencës së sistemit të ri, i cili ka ende problemet e veta, por edhe kështu siç është ka dhënë dy prova të mëdha, si një sistem ARMIQËSOR ME KORRUPSIONIN dhe MIQËSOR ME QYTETARIN”-shkruan Rama në rrjetet e tij sociale.

Në këtë qëndrim ka vetë dy rrugë dhe asesi nuk mund të ketë një të tretë, ose kryeministrin Edi Rama e mashtrojnë, rëndë, po shumë rëndë, ose vetë ai e ka hobi të mashtrojë qytetarët, edhe ata që e vuajnë në shpinë sistemin e ri aktual, të vjetrin që shkoi, apo edhe atë që do të vijë.

Në fakt sistemi i ri ka shtuar edhe më shumë mundësinë e korrupsionit. Faktet janë sheshit. Në momentin që qytetarët nuk marrin shërbimin e duhur në kohë, por në shumë raste edhe kur e marrin u vjen një përgjigje për “plotësim dokumentash”, apo gabime trashanike deri në ngatërrime emrash të pronarëve apo bashkëpronarëve, nuk ke se ku të ankohesh. Asnjë zyrë s’ka të hapur. Në këto kushte nis “operacioni miku”…

Në këtë fshat të madh gjithkush njeh dikë që mund të njohë dike në kadastër. Gjenden lidhjet, sigurohet shuma e alleshverishit dhe më pas për pak kohë, të vjen përgjigja që kërkon, dokumenti i pronësisë, rifreskimi i një certificate apo legalizimi i një banese. Ndryshimi është se dokumentat nuk t’i merr më zyrtari dorazi, por të sugjeron që të riaplikosh, madje pasi të ka marrë një shumë të mirë nëndorë, të bën “nder” duke të thënë: apliko “AV0”, që nënkupton që nuk do ripagush për tarifën e shërbimit.

Ka plot raste ku këta “armiqësorët me korrupsionin” të sugjerojnë që edhe aplikimin online ta bësh tek një noter që njohin, apo ndonjë person që ka hapur zyrë eknkas duke reklamuar në xhamat e zyriçkave: “Bëjmë aplikime për në Kadastër”…

Kjo është situata sot, ku vetë Rama si për të treguar se sistemi funksionon kishte nxjerrë një tabelë me emrat e aplikuesve, datën kur ishte bërë aplikimi dhe datën kur kishin marrë përgjigje. Nuk vihet në diskutim ato shtatë aplikime “reklamuese” të Ramës, por nëse faqja e tij qëndron e hapur për vetëm dy orë, jo më shumë, me siguri do i mbushet me mijëra foto dhe screenshot-e nga qytetarët që tregojnë se aplikimet i kanë bërë në nisje të korrik e nuk kanë marrë ende përgjigje as në fundin e gushtit.  PO, aq të shumta do jenë ankesat qytetare sa vetë Ramës do i duhet të hapë “ftesë për tender” me objekt: “sistem të ri digjital” pasi do i bllokohen rrjetet sociale nga mijëra ankesa… Vetë Rama ca muaj më parë ka përmendur pa teklif fjalën “talltrapsat”, në një kontekst tjetër, por këtë herë i shkon fare përshtat për çështjen e Kadastrës.