Kryeministri Edi Rama thirri dje një “konferencë të jashtëzakonshme” shtypi dhe kur të gjithë ishin mprehur të pyetej për arrestimin e Vangjush Dakos, ai lajmëroi se kishte vënë “botën perëndimore” në lëvizje, si SHBA-në, Gjermaninë dhe Francën, duke iu dorëzuar një draft për zgjidhjen e konfliktit Kosovë-Serbi.
“Ky është dokument konfidencial i cili nuk pretendon të jetë zgjidhja ideale, por është një dokument i nivelit më të lartë ndërkombëtar që merr në konsideratë arsyet për krijimin e asociacionit dhe se ai është pjesë e organizimit të jetës në republikën e Kosovës. Adreson të gjithë rekomandimet e Gjykatës Kushtetuese të saj. Shpresoj që ky material ta çojë dialogun në një nivel tjetër, e jo të flasin me vete e për vete”, tha Rama.
Ai nuk zbuloi asnjë detaj nga drafti, as kush e kishte hartuar, por e tha hapur se ja kishte dërguar kancelarit gjerman, presidentit francez, e madje edhe SHBA-ve.
Kushedi se çfarë planesh brilante ka në atë draft që zgjidh “përfundimisht” krizën shekullore Serbi-Kosovë. Kancelari Scholz, presidenti Macron, e ndoshta edhe vetë presidenti amerikan Biden në këto momente janë duke lexuar draftin e Ramës dhe do të mahniten sesi “lideri global”, që drejton një vend të vogël dhe të varfër, ofron shërbime të tilla që me drafte jo vetëm i japin fund konflikteve në Ballkan, por mund të shërbejë si precedent edhe për zgjidhjen e luftërave në botë.
Nuk dihet nëse treshja Biden, Scholz dhe Maron mund të mbajnë një takim të përbashkët dhe më pas konferencë shtypi për të falenderuar Ramën për “zgjidhjen ideale” që ai propozon. Vetë Rama e la surprizë këtë propozim, duke na ndalur dhe frymën në pritje që të shpërthejnë fishekzjarret e gëzimit në të dyja vendet, si në Prishtinë ashtu edhe në Beograd.
Nuk është më aspak çudi që pas këtij “suksesi”, Ramës t’i kërkohet nga krerët e SHBA-së, Francës dhe Gjermanisë që të mundohet të gjejë paksa kohë, duke lënë pas pikturat dhe poçat e baltës dhe të punojë drafte të tjera… Më kryesore është drafti i pritshëm nga Rama për ndalimin e luftës Rusi-Ukrainë, më pas edhe për zbutjen e tensioneve Kinë-Taivan, Pakistan-Indi dhe Izrael-Palestinë. Pas një pauze disi të gjatë dhe të ketë kaluar gushti i pushimeve, mund t’i kërkojnë edhe drafte të tjera për të shuar njëherë e mirë edhe luftërat në Afrikë.
Para tre vitesh kur askush nuk e priste, Rama shpalli projektin “Ballkani i Hapur”, pasi u konsultua me presidentin Vuçiç. Shpesh na e thoshte se do të shihni rezultatet e saj, duke përbuzur “kinse nacionalistët” sikurse i quante kritikët, por sot po kuptohet se Rama nuk është më një “lider rajonal”-sikurse e quante presidenti serb, por një “lider global”.
Çdo e mirë e ka edhe një të keqe. Rilindasit nuk duhet të gëzohen shumë, pasi nuk është çudi që Ramës t’i propozohet një post madhor siç është kreu i OKB-së, por me të drejta “ekzekutive” për të zgjidhur konfliktet nëpër botë, gjithnjë duket shkruar drafte.
