“E bën detyrën shumë mirë çdo ditë Çuçi”. Kështu u shpreh kryetari i grupit parlamentar të Partisë Socialiste Balla këtë të Premte, pas një aktiviteti në Kuvend.
Deklarata erdhi në përgjigje të pyetjeve të gazetarëve, të cilët i kujtuan kryetarit të grupit socialist ngjarjet kriminale të ndodhura javët e fundit.
Orët e para të Hënës një breshëri plumbash u derdh mbi godinën e “Top Channel”, duke lënë të vdekur rojën që punonte pranë televizionit, 60-vjeçarin Pal Koka, baba i tre fëmijëve. Ky i fundit me shumë gjasë s’ka asnjë lidhje me konfliktin e mundshëm mes urdhëruesve të atentatit dhe pronarëve. Policia gjeti një makinë të djegur tip “Range Rover” që dyshohet se u përdor në ngjarje, ndërsa autorët, siç ndodh rëndom, u arratisën në drejtim të paditur për policinë.
Krimi tronditës erdhi në vazhdën e një sërë ngjarjesh të rënda që kanë shokuar kryeqytetin javët e fundit. Vrasja e tre grave nga Dan Hutra dhe plagosja e dy të tjerave ishte një tjetër gjëmë për banorët kryeqytetas dhe jo vetëm. Pas ekzekutimeve, Hutra endej rrugëve të Tiranës me synimin, siç do të shprehej në dëshminë e tij më pas, për të ekzekutuar objektivin tjetër. Arrestimi erdhi vetëm falë telefonatës në polici të një qytetari që arriti ta identifikojë dhe të njoftojë autoritetet. “Inteligjenca informative” – togfjalësh që policia e përdor rëndom në njoftimet për mediat, në këtë rast rezultoi në pozicion jashtë loje. Ekspertë të sigurisë ngritën pikëpyetje se ku ishin satelitët e propaganduar me aq zell nga kryeministri Edi Rama.
E njëjta pyetje u bë edhe kur u vra 60-vjeçarja Mimoza Paja, në atentatin po të stilit mafioz si në rastin ndaj TCH, në një lokal në “Don Bosko”. Sipas hetimeve, autorët qëlluan me breshëri ndaj lokalit të Fation Muratit, duke vrarë banakieren Mimoza dhe plagosur disa të tjerë, dogjën makinën e përdorur në atentatit dhe u larguan, sigurisht… në drejtim të paditur.
Plumba u derdhën sërish dje në Lushnje, duke plagosur një grua, ndërsa familjarët e saj hodhën akuza ndaj policisë. “Policia nuk ka marrë asnjë masë”, tha i vëllai i plagosurës duke shpjeguar më tej se mes familjes së tyre dhe autorëve të dyshuar ka një hasmëri që dy vite më parë shkaktoi një tjetër vrasje.
Kavaja po ashtu u trondit nga një vrasje e dyfishtë pas një konflikti mes dy personave të cilët qëlluan njeri-tjetrin me thikë e armë zjarri. Njëri prej fatkeqëve u vra në sy të fëmijës së mitur. Për mediat, banorët do të shprehnin se ndiheshin të frikësuar për jetën. “Ndihem 800% i pasiguritë”, tha një qytetar.
Një adoleshent u plagos dje me mjet prerës në një shkollë 9-vjeçare në Paskuqan, një i ri u qëllua me thikë mbrëmjen e së Mërkurës në zonën e “Komunës së Parisit” në Tiranë.
Shpërthimet e fuqishme me tritol si në Sarandë dhe Arrameras të Fushë-Krujës trembin ende banorët.
Lista vijon dhe është e gjatë.
Krimi sundon në mënyrë brutale! Por nëse kjo për Edi Ramën nënkupton se “situata e rendit s’ka qenë kurrë më mirë” dhe për Taulant Ballën përkthehet një punë e mirë e ministrit të Brendshëm Bledi Çuçi, atëherë një kërkesë me përulësi: O Çuç, aman, mos puno kaq mirë!
