Sot, në Ballkan, lufta po zhvillohet jo më me armë, por në sferën e luftës së ideve, mohimit të historisë, ndryshimit të fakteve historike apo interpretimit të tyre sipas midesë së liderëve dhe organizatave pas tyre.

Masakra e tmerrshme që ndodhi në Bosnje dhe Hercegovinë sot ka nisur të shihet ndryshe. Mjafton një çarje e vogël, një konspiracionist që del në emisionet qëndrore, një mohim i gjenocidit dhe bëhesh i klikuar. Dikush sheh aty një të çmendur, i çmenduri sheh famë, shovinistët shohin një shans të artë.

Për shembull, prej vitesh, një pjesë e shovinistëve serbë e ka legjitimuar ndërhyrjen në Bosnje se ata ishin myslimanë dhe, si të tillë, duheshin zhdukur nga Ballkani, duke i dhënë qasjen e luftës së shenjtë; një pjesë tjetër thotë se vetëm kufijtë etnikë i zgjidhin problemet në Ballkan, duke propaganduar idetë ruse në këtë rajon, për të hequr paralele me Krimenë apo rajonet e tjera të pushtuara në Ukrainë. Ndërkohë, ka edhe një pjesë konspiracionistësh që flasin me të njëjtat terma si mohimi i Holokaustit, duke thënë se në këtë rast po flasim për inskenim. 

Ish-Drejtori politik në Ministrinë e Jashtme të Malit të Zi, Vesko Garçeviq, ka vënë gishtin drejtëpërdrejtë për ndryshimin e kësaj narrative te Kisha Ortodokse Serbe. Sipas tij, ajo është shumë e përfshirë në të gjitha këto narrativa, sidomos kur flasim për Bosnjën, apo për luftërat në territorin e ish-Jugosllavisë, dhe ka mbështetur politikat e Millosheviçit dhe të ndryshimit të kufijve për krijimin e Serbisë së Madhe.

Rreziku për shqiptarët është në horizont. Me gjyqin në Hagë, po tenton të ndërrohet narrativa për UÇK-në. Deri dje, me propagandë serbe na kanë stigmatizuar si myslimanë, duke përdorur të njëjtën retorikë si në Bosnjë. Zëdhënës të kësaj teze ka me qindra ndër shqiptarë. Kjo propagandë ka zënë vend tashmë. Është punuar gjatë në këtë pikë duke rekrutuar hoxhallarë dhe intelektualë për t’i dhënë zë.

Faza e dytë, me shumë gjasë, është ajo që kërkon kryeminstri Edi Rama, implementimin e statusit special të Kishës Serbe brenda në Kosovë. Ndër historianët serbë të atashuar pranë Kishës Serbe, Dushan Batakoviç, shkruan se ka mbi 1500 objekte kulti të ndërtuara në Kosovë, dhe, po të shohësh me kujdes, është si të jenë vënë me dorë për të përçarë vendin, njësoj si kolonizimi ndër dekada.

Në fund, ashtu si po ndodh me Bosnjen, Kisha Serbe dhe zëdhënësit e saj do të shtyjnë përpara përçarjen më të fortë në vend. Njëra palë do të amplifikojë luftën e shenjtë për çlirimin nga zgjedha shqiptare dhe shqiptarët do të mbajnë lart UÇK-në.