Masakra që ndodhi në 25 prill me zgjedhjet ishte flagrante dhe asgjësuese për demokracinë .
Angazhimi agresiv i strukturave kriminale dhe ndërhyrja strukturore e shtetit , pra shkrirja e partisë me shtetin në manipulimin më të madh të vullnetit të qytetarëve këto 30 vite, ishte brutal, i paprecedentë dhe fenomeni më shqetësues i këtyre zgjedhjeve.
Sigurisht, përpjekje të tilla për të ndikuar rezultatin ka pasur edhe në zgjedhjet e mëparshme, por nuk kanë qenë asnjëherë kaq masive dhe kapilare sa në fund të jenë vendimtare dhe të përcaktojnë fatin e tyre.
Por, ajo që po e bën atë një manipulim të rrezikshëm për stabilitetin e vendit nuk është vjedhja në vetvete, por është injorimi i këtij realiteti dhe shpallja e kësaj masakre si “zgjedhje të pranueshme”.
Ky është problemi më i madh dhe për pasojë deformimi më i rrezikshëm që ka pësuar një proces zgjedhor që nga viti 1991.
Për këtë arsye Partia Demokratike ndodhet para një vendimi historik. Kjo sepse ky vendim do të ndikojë pa diskutim jo vetëm mbi fatin e saj, por edhe mbi fatin e Shqipërisë .
Përpara saj janë dy opsione, ai i pranimit dhe integrimit në këtë sistem ose ai i refuzimit dhe përballjes me të.
Opsionin e parë, atë të pranimit dhe integrimit në këtë sistem, PD e ka hedhur gjithmonë poshtë me neveri. Kjo sepse shkon kundër misionit të saj historik , kundër arsyeve për të cilat ajo egziston dhe kundër parimeve që ajo mbron. Për pasojë çdo shmangje do ta çonte PD automatikisht drejt vetëasgjësimit dhe Shqipërinë drejt një autokracie.
Ndërsa opsioni i dytë, refuzimi dhe pëballja me këtë regjim, e vendos atë përballë një sfide egzistenciale, sepse ka përballë një makineri të pasfidueshme shtetërore të bërë njësh me krimin, miliardat dhe shantazhi i të cilës ka fuqinë të heshtë dhe nënshtrojë cilindo.
Pra, PD ndodhet përballë një sfide shumë të rëndë, por ajo nuk mund t’i shmanget misionit të saj historik sepse përndryshe i bie të pushojë së egzistuari, sepse e ka frymëzimin në arsyet e egzistencës së saj, në luftën për liri dhe demokraci, mision që realizoi me sukses në 1990.
Kështu që të gjitha llogaritë të çojnë tek një vendim për një qëndrim të vendosur për mosnjohjen e këtyre zgjedhjeve dhe një distancim i qartë ndaj çdo oferte dhe qëndrim i palëkundur ndaj çdo presioni, pavarësisht pasojave.
Çdo devijim ndaj kësaj do të prodhojë vetëm krizë, destabilitet, regres dhe do të rikthejë Shqipërinë nën hijet e të njëjtit regjim që lamë pas.
