Kryetari Rama gjatë gjithë punimeve të këtij Kongresi, vetëm ka nxirë e ka shfryrë, kurse djersët e sikletit i shpërthenin deri te fokusi i kamerave. Bashkë me kryetarin nxinin edhe të tjerët, sidomos ata në rresht të parë. Pavarësisht nga dekoret madhështore dhe të kuruara me kujdes, pavarësisht nga feksja e trëndafilit rozë dhe “fuqia” simbolike e grushtit të mbledhur të socialistëve të vjetër, e gjitha nuk e tejkaloi dot një ceremoni mortore.

Ai ka pak kohë që i është rikthyer Partisë Socialiste. Po monton sërish grushtin dhe trëndafilin e të majtëve, kurse mëngjesin e sotëm u kujdes që të pozonte në korridoret e selisë së Partisë Socialiste  me fotografinë e Fatos Nanos dhe simbolet e vjetra. Nëse bën një vëzhgim të thjeshtë gjatë gjithë viteve që kur Edi Rama ka marrë frenat e PS, do vërejmë një fenomen sa interesant aq edhe makiavelik.

Sa herë që ai ndihet rehat dhe i plotfuqishëm, zhduk çdo shenjë të Partisë Socialiste dhe e identifikon këtë forcë politike, vetëm me simbolet e “Rilindjes” të cilën e ka shpikur vetë. Përpara se të vinte në pushtet, ai shfaqej si një socialist “i thekur”, duke i quajtur të shenjta simbolet e vitit 1991 të cilat u miratuan pasi Partia e Punës u konvertua në Socialiste.

Kur ishte në opozitë, “mbret” ishte Partia Socialiste. Sa u fut në zyrën e kryeministrit në vitin 2013, krijoi nga hiçi “Rilindjen”. Zhveshi lakuriq “partinë e vjetër” nga simbolet demode dhe imponoi ngjyrën e tij të preferuar.

Kujtohuni: Vetëm 2-3 muaj përpara e gjatë fushatave zgjedhore, Edi Rama, rikthen gjithmonë emrin e madh dhe shenjat identifikuese të PS.

Por jo vetëm atëherë; Kur është në siklet të madh dhe pasi i plasin skandale dhe afera që rrezikojnë edhe atë vetë, Rama rikthen në fron PS-në, me gjithë simbolet origjinale.

Pse e bënë këtë?

Sepse kur është koha për të mbledhur votat që duhen për të siguruar pushtetin, atij i duhen dhe shfrytëzon socialistët dhe të majtët (edhe komunistët në bindje), të cilët për hir të së vërtetës janë të shumtë në këtë vend.

Ju tregon se PS është ajo që ka qenë, ndaj votojeni se më mirë do bëhet për ju. Në fakt PS ka firuar me kohë, pavarësisht nga fotografitë me pezhishka të Fatos Nanos (me grusht e trëndafil rozë në sfond), të cilat nxirren nga bodrumi në kësi rastesh halli.

Pra përveçse në kohë zgjedhjesh për “qorrat militantë”, edhe kur është në siklet dhe rrezik si në kohën e skandalit me Saimir Tahirin, apo sot me “bombën”- Incenerator, ai rikthen PS-në sepse i duhet si një mburojë.

Sot në emër të PS-së dhe socialistëve të thjeshtë, paralajmëroi SPAK-un. Në fakt ky i fundit nuk ka punë me socialistët e ngratë, por vetëm me disa kokrra të rrethit të tij të ngushtë; ministra, deputetë e kryetar bashkish, të cilët kanë abuzuar dhe po hetohen për zhdukjen e qindra milion eurove. Po të bësh një inventar të të arrestuarve e të të hetuarve (zyrtarë e deputetë), asnjëri prej tyre nuk është “socialist” më i vjetër se këto 9 vite që Edi Rama është në pushtet.

Gjithë ditën në Kongres Rama foli për partinë, PS-në, socialistët e thjeshtë. I quajti pasuri, “sytë e ballit”, e madje kishte dhënë urdhër që të gjithë ti drejtoheshin njëri- tjetrit jo si më parë “Zonjë-zotëri”, por Shoqja-shoku”. Shoqja milionere- njëri-shoku miliarder tjetri!

Gjithë ditën e Kongresit Rama ishte kryetari i Partisë Socialiste që ka marrë me shumicë vullnetin e popullit dhe jo kryeministër siç është e ka qenë gjatë 9 viteve të fundit. Nëntë vite për të cilat Departamenti i Shtetit thotë se, kemi qeverisjen më të korruptuar në gjithë Europën.

Por edhe nën petkun e kryetarit të “partisë më të madhe që e do populli”, që nga nisja deri në fund të punimeve të këtij Kongresi, ai vetëm ka nxirë e ka shfryrë. Kurse djersët e sikletit i shpërthenin, deri te fokusi i kamerave. Bashkë me kryetarin nxinin edhe të tjerët. Sidomos ata në rresht të parë të cilët çelnin në fytyrë, vetëm kur “i madhi” paralajmëronte dhe shantazhonte hapur SPAK-un i cili duhet të ndalojë urgjentisht arrestimet e “socialistëve”. Pra të “shoqeve dhe shokëve”.

 Pavarësisht nga dekoret madhështore dhe të kuruara me kujdes, pavarësisht nga feksja e trëndafilit rozë dhe “fuqia” simbolike e grushtit të mbledhur të socialistëve të vjetër, e gjitha nuk e tejkaloi dot një ceremoni mortore. Por nuk ishte funerali i PS-së. Ajo fatkeqësisht ka vdekur kohë më parë. Ceremonia mortore (madhështore patjetër) me emri “Kongres”, ju bë “Rilindjes”. Lindi me bujë 9 vite më parë dhe po cof sot te dyert e SPAK!