Mënyra si si reagoi Elvana Gjata pas humbjes së çmimit të parë në festivalin e 58 në RTSH, dhe sidomos ajo se si u soll prezantuesja Alketa Vejsiu, jo vetëm që lanë në publik idenë e një pakti të prishur që konsistonte në fitoren pa garë të këngëtares, por mbi të gjitha ato kanë prodhuar në publik efektin e kundërt. Kështu, në vend që ta shohë si viktimë që i është ngrënë haku, një pjesë e njerëzve dhe opinionistëve kanë filluar ta vështrojnë Elvana Gjatën si një artiste arrogante që as denjon ta pranojë konkurencën me një baby face si Arilena Arra. Nga njëra anë ka personalitete si Adelina Ismaili, që e përshëndetën fitoren e Arilenës si një sukses “pa ndihmën e parave dhe të shitjes së trupit”. Pa e përcaktuar se kush i kish bërë këto mëkate, Adelina shigjetoi Alketën për mënyrën se si qe sjellë me fituesen.

Por kishte edhe nga ata që qenë më të drejtëpërdrejtë. Kështu poeti dhe skenaristi Petrit Ruka u bazua në elementin e tekstitë të këngës së Elvanës për ta bërë copë atë. “Organizatorët e këtij festivali duheshin “arrestuar” në sallë për krim ndaj gjuhës shqipe dhe fyerje të rëndë të dinjitetit te kultures kombëtare shqiptare. Duhet hartuar me ngut një ligj i posaçëm që këngët në Festivalin e RTSH duhet të vijnë patjetër në standard dhe të kenë poshtë firmën aprovuese të dhjetë poetëve më të mirë të vendit. Unë vetë nuk do ta pranoja këtë tekst edhe sikur të vinte me muzikën e Ennio Morricone-s” ka shkruar Ruka dhe si për ta çuar në ekstrem qesharakëzimin ka botuar edhe tekstin e këngës të cilës Elvana i ka bërë edhe fjalët edhe muzikën edhe e ka kënduar vetë…

Ti kam fal ty me tana

Me tana o me tana

Dashni me fal

O kush ka me ma nal?

A ma thua edhe sa

Duhet të pres ty me të pa

Ta di, dua ta di dhe sa

Kohën ndale ndale

Të shkoj ngadale ndale

O më ngadale ndale

Na na na na na

Po me tekstin ka zgjedhur të merret edhe gazetari Mentor Kikia, i cili ka bërë edhe një shkrim shumë të fortë kundër Elvana Gjatës, në kohën që emri i saj u përfshi në një plagosje të blloku, duke e qujatur si një antimodel për shoqërinë.

 “A shikon ndokush donjë fije poezi në këtë tekst? Unë them askund, as poezi, as mesazh, vetëm fjalë kuturru. Çfarë do të thotë “me tana”? Në shqipen zyrtare do të thotë “me të gjitha, me të tëra”. Në gegënisht thuhet “me të tana”. Ndërsa në elvanisht, shkurtohet në “me tana”.

Por edhe Pandi Laço që ka dashur të marrë në mbrojtje këngëtaren si një copëz në mozaikun e përgjithshëm të një kulture bajate, megjithëse fajëson gjithë shoqërinë për shijet që ka kultivuar e ka renditur Elvana Gjatën mes “mëkatareve”

 “Në këtë kaos muzikor, sot gurët hidhen mbi Elvanën, por në këto ditë Krishtlindjesh, më lejoni t’ju sjell një fragment të Biblës, kur para Krishtit, gati po ekzekutohej një grua: “Kush nga ju është pa mëkat, atëherë le të hedhë gurë kundër saj”… e duke vijuar “As unë s’mund të të dënoj… shko e mos mëkato më”-ka shkruar ai.

Pikërisht mëkati i shijeve të këngës që Elvana Gjata prezantoi në festival, i shumfishuar me mëkatin e sjelljes së atyre që e donin fituese me çdo kusht dhe me mëkatin e mediave të sposorizuara që po e shesin si viktimë të një konspiracioni, ka ngjallur gjithë këtë kundërreagim ndaj Elvana Gjatës, që po merr goditjen e dytë, pas mos shkuarjes dot në Eurovision.