Sipas një teorie që janë kanë këshilluar strategët e huaj që herët, Edi Rama ka tentuar gjithnjë të ndjekë rrugën e të bërit qesharake, të problemeve dhe çështjeve të mprehta të vendit, si shtegu më i mirë për të shmangur përballjen, sidomos në debatin me kundërshtarin politik.

Kështu bënte humor me njerëz të ekipeve të tij lidhur me të shkuarën kriminale, për të përqeshur dekriminalizimin, teksa në lista i dilnin jo pak persona të dënuar. Po paçka fakteve, ai arrinte ta zbuste fenomenin.

Në këtë mënyrë, futi në siklet qeverinë Berisha në garën e vitit 2013, kur u tall me një prej arritjeve më të mëdha të ish-kryeministrit, që ishin rrugët, revolucioni në infrastrukturë.

10 mijë kilometra rrugë deklaronte Berisha – me shku në hënë e me u kthy, ja priste Rama. Ose Tiranë-Tokio e kthim.

Dhe pati jo pak efekt.

Po një prej rasteve kur kjo nuk po i ecën, është shakaja me krimin dhe me drogën.

Për ta reduktuar si problem, ai u përtall me opozitën, dhe nxori një si refren, krimi-droga, krimi droga.

Mirëpo, në realitet krimi dhe droga nuk po ndalen.

Vrasjet janë në një nivel alarmant, dhe ekzekutimet mafioze e kriminale të pandalshme. Sepse, për çudinë e të gjithëve, për marrjen e jetëve brenda familjes, është krijuar një ide se qeveria nuk ka asfare të bëjë dhe ska pse jep llogari.

Më anë tjetër, hashashi ka nisur tashmë të kultivohet masivisht.

Këto dy zhvillime të kronikës së zezë po insistojnë çdo ditë dhe kanë tendencën të rriten.

Përballë kemi tashmë një qeveri dhe drejtor të përgjithshëm të policisë që heshtin.

Hesht edhe Rama, burimi i madh i batutave.

Nuk dëgjohet më të përfshihet në luftën ndaj këtyre dukurive, duke i bërë ato qesharake.

Gjasat janë që edhe këtë mandat të tretë, një prej refreneve më të qendrushme të jenë pikërisht; krimi dhe droga.