Quhet Dormio. Team nga MIT i Bostonit ndikoi me sukses në ëndrrat e shumicës së pjesëmarrësve të eksperimentit që u nxitën të ëndërronin një pemë dhe një burim çokollate
Implantim i ideve dhe mendimeve specifike në ëndrrat e njerëzve për t’i ndihmuar ata të rrisin kreativitetin ose për të menaxhuar momente veçanërisht stresuese. Ky është qëllimi, i përshkruar në një artikull të botuar në revistën Consciousness and Cognition, nga ekspertë të Massachusetts Institute of Technology (MIT), të cilët përdorën inkubacionin e synuar të ëndrrave (TDI) për të drejtuar ëndrrat e njerëzve drejt temave specifike, duke përsëritur informacion gjatë gjendjes hipnagogjike, e cila karakterizon kalimin nga qënia zgjuar në gjumë.
“Faza hipnagogjike – shpjegon Tomás Vega nga MIT Media Lab dhe bashkautor i artikullit – zakonisht lidhet me ëndrrat mbi fenomenet psikedelike. Teknika jonë përdor një instrument të quajtur Dormio, një pajisje për gjurmimin e gjumit elektronik që vihet në kyçin e subjektit, është një aplikacion që lëshon sinjale audio”.
Ekipi ka ndikuar me sukses në ëndrrat e shumicës së pjesëmarrësve në eksperiment, të cilët u nxitën të ëndërronin një pemë dhe një burim çokollate. “Nga këndvështrimi i valëve trunore – vazhdon Pattie Maes i MIT Media Lab, autori i parë i studimit – hipnagogjia është e ngjashme me fazën REM, me ndryshimin që në këtë periudhë kohore individët janë akoma në gjendje të perceptojnë stimujt audio. Në këtë mënyrë përdoruesi mund të vendosë se çfarë të ëndërrojë, duke e programuar aplikacionin për të ndikuar në përmbajtjen e ëndrrave”.
Gjurmuesi i gjumit, shpjegojnë autorët, monitoron frekuencën kardiake dhe aktivitetin elektrodermik, ndryshimet në rezistencën e lëkurës ndaj një rryme të vogël elektrike bazuar në aktivitetin e gjëndrës së djersës. Çdo seancë ka patur një kohëzgjatje përafërsisht prej 45 minutash, në mënyrë që t’i lejohej eksperimentuesve të kryenin më shumë se një kontroll mbi përmbajtjen e ëndrrave të pjesëmarrësve, të cilët pyeteshin se çfarë po mendonin pas zgjimit pas fazës hipnagogjike.
“67 përqind e personave – vëzhgon studiuesi – raportuan elemente të lidhura drejtpërdrejt me ndikimet. I kërkonim nëpërmjet audios të kujtonin një pemë, dhe shumica e njerëzve përmendnin pemë kur u zgjuan, me përshkrime pak a shumë të ndërlikuara në varësi të kohës që pjesëmarrësi ëndërronte”.
Vetë autori Tomás Vega iu nënshtrua procedurës, duke ndikuar në materialin e tij të ëndrrave dhe duke ëndërruar fabrikën e çokollatave të filmit artistik me Gene Wilder. “Ekzistojnë gjithmonë pengesa – shpjegon ai – Kam ëndërruar për burimin karakteristik të çokollatës dhe Oompa Loompa, por meqenëse jam intolerant ndaj laktozës, nënvetëdija ime më tregoi një kaskadë me çokollatë të zezë. Mendoj se është vërtet interesante të jesh në gjendje të ndikosh në përmbajtjen e ëndrrave”.
“Përveç përfitimeve nga shkencëtarët – përfundon Maes – puna jonë mund të çojë në teknologji të reja komerciale që shkojnë përtej monitorimit të gjumit dhe mundet potencialisht të ndihmojnë në menaxhimin e çrregullimeve për shkak të stresit, cilësisë së gjumit, kujtesës dhe të të mësuarit”.
