Eh çdo derdhet birra lumë, e mijëra kërnacka të shuhen mbllaçitjet e gojës në festën që do të mbahet në Korçë, me këngët e Goran Bregoviçit. Kjo është festë për të mpirë mendjen e mjeruar të qytetarëve që sot po “protestojnë” në rrjetet sociale, duke shfryrë dufin ndaj këngëtarit serb, i cili thuhet se ka përkrahur masakrat në Kosovë, Kroaci, apo Bosnje. E ka ftuar Bashkia e Korçës që drejtohet nga “Taqka i Rilindjes”, Sotiraq Filo, sigurisht me miratimin e Brate Edit, të madhit që kujdeset për gjithçka që ka të bëjë jo me muzikën tallava, por për të tollovitur mendjet e njerëzve.
Ia ka arritur qëllimit. Sot po merren me Goran Bregoviçin, që vetë Rama kur ishte kryebashkiak i Tiranës e ftoi të këndonte në Pallatin e Kongreseve, edhe atëkohë mes polemikash. Po ku ka mendje më brilante se e Ramës, që edhe atë banorin e Gjirokastrës, Vlorës, Kukësit, Mirditës, Durrësit, Fierit e kudo tjetër ku zjarri po i përpin dhe plerat po na mbysin të merren me Goranin, dhe jo me hallin e madh dhe qeverinë e cila me dhe pa zjarr u ka djegur mendjen dhe ka varrosur protestën.
Kaq shumë qytetarët nuk reaguan kur firmosj marrëveshja e Minishengenit Ballkanik mes Ramës, Brates së tij Vuçiç dhe Zaevit, një nismë që ka futur hundët deri në kapërcimin e kufirit të antishqiptarizmit. Tregtarit dhe këngëtarit serb Rama do ia ngrejë traun që të kalojë lirshëm, pa paguar doganë dhe të lëvizë qetësisht në Shqipëri. Ndërsa atij shqiptarit të zonës së Kosovës do i kërkojë haraçin, një herë në doganë dhe një herë në rrugën e kombit, duke i grabitur edhe dhjetë euro për hyrje-daljen…
Për këtë nismë që mban firmën e Brate Edit (vëlla Edit në serbisht) nuk pati “patriot” të ngrenë zërin, por lëkundim flamujtë e patriotizmit duke treguar me gisht një këngëtar tallavaje që me këngët e tij mund të ketë “ikurajuar” masakrat. Po nëse ndodh ndonjë incident, qoftë edhe i stisur, atëherë Brate Edi do të dalë i pari për të marrë në duar flamurin e bardhë të kërkimit të ndesës për fyerjen e Brate Goranit. Do nxjerrim veten si “arrogantë” dhe vrasësi do bëhet viktimë, duke mbuluar krimet e tmerrshme në Kosovë me birrën e Taqkës së Korçës.
Lexo më shumë
Po sot Rama dhe Taqka u ka dhënë një kërnackë për lëpirje dhe një birrë për shpëlarje truri kujtdo që nuk merret mne problemin e madh, por me provokimin e vogël dhe rend pas moçaleve që ngre pushteti.
Nëse nuk do ndodhë asnjë incident, atëherë përsëri Brate Edi do shfaqet si politikani vizionar që “heq kufijtë e urrejtjes” dhe kthen popullin e tij nga viktimë shekullore në “agresore ditore”. Padyshim që në Serbi e kanë nisur që tani vallen e përcjelljes së Goranit, duke pasur të gatshme shkrimet, propagandën antishqiptare dhe i cilësuar si “të paditurit e Ballkanit” që nuk duan fqinjësinë e mirë.
Duatrokitësi i kësaj tragjikomedie shëtitëse është sërish Brate Edi, që në vitin 2014 shëtiti flamurin e “patriotizmit” në Serbi dhe më pas e bojatisi me penën e nëshkrimit të marrëveshjeve që bëjnë një udhë të frikshme Tiranë-Beograd. Po cilësohen si “të pagdhëndur” qytetarët dhe politikanët e Kosovës që për hir të Vëlla Edit që u “konvertua” në Brate…, mbajnë mbi shpinë haraçin e madh që nuk u erdhi nga agresori shekullor por nga megallomania politike dhe haluçinative e kryeqrilindasit që po nënshtron ekonomikisht dhe ekzistencialisht një komb.
Bratja i madh që ka rrëmbyer tre mandate rresht është dirigjenti i “tallasë” që do mbahet në Korçë. Suksesin e ka arritur, qoftë edhe për pak ditë na bëri të harrojmë zjarrin në prag dhe pasi tu dalë pija dhe ikë era e kërnackave do takohemi sërish në shfaqjen e radhës.
