Nëse do të isha njëri nga kandidatët për Kryetar i Partisë Demokratike, përpara se të shpallja kandidaturën, unë do të bëja analizën e fakteve rreth zgjedhjeve të 25 prillit. Kur të shikoja faktet dhe të sigurohesha se zgjedhjet u vodhën, u blenë dhe u manipuluan, unë do të kërkoja protesta. Madje nuk kisha pse të pres vendimin e partisë, por do t’i organizoja vet ato. Sepse, dreqi e marrtë, që të pretendosh të drejtosh një parti si Partia Demokratike, së pari duhet të njohësh veten, aftësitë e tua, idetë e tua, të kesh pak sensin e masës dhe të realitetit, dhe mbi të gjitha, të kesh guxim. Domethënë të jesh aq trim sa të marrësh rrezikun në sy, që tek presioni, shantazhi, shpifja, dhuna dhe kërcënimi. Domethënë, duhet të parashikosh edhe tundimin që do të të vijë nga Edi Rama si Cash Flow në formë koktejli. Së fundi, duhet të marrësh në sy edhe rrethanat e tua familjare, dhe të sigurohesh se ti nuk do të mund të shantazhohesh përmes anëtarëve të familjes.
Vetëm pasi ta kisha bërë këtë bilanc mundësishë, unë do të dilja në protestë me grupin tim të mbështetësve. Pa leje nga partia, por pa e sharë për asnjë sekondë partinë, dhe duke i ftuar qytetarët që të protestojnë bashkë me mua. Aty do të mbaja një fjalë të fortë, brilante, frymëzuese – kundër Edi Ramës, si e keqja më e madhe e këtij vendi pas Enver Hoxhës. Duke ia renditur të gjitha të këqijat që u ka bërë shqiptarëve. Të frymëzosh njerëzit është art i veçantë, dhe kjo nuk mund të bëhet ndryshe përveçse në sheshe, përballë njerëzve, me shpirtē dhe sakrifica. Sepse përballë ke mafian, dhe kjo nuk është një shaka.
Por këtë do ta bëja që javën e parë pas 25 prillit, megjithse edhe tani nuk është vonë.
Me siguri shumë njerëz do të vinin pas meje, dhe me gjasë, pas ca kohësh e gjithë partia, madje edhe vet Lulzim Basha.
Kur partia të ishte e fortë mjaftueshëm, dhe kur pozitat e Bashës brenda partisë do të ishin të dobësuara mjaftueshëm, unë do të mendoja seriozisht kandidimin. Por pa e sharë për asnjë moment Lulzim Bashën.
Ja, këtë do të bëja. Por unë jam tjetërsoj, nuk jam KANDIDAT.
