Kryeministri Edi Rama duhet se ka një arsenal të preferuar sharjesh që e përdor për të sulmuar kundërshtarët e tij politikë, e që i risjell në publik sa herë ka fushatë elektorale.
Fjalorin e sharjes, që zë një vend të konsiderueshëm të ligjërimit të tij gjatë fushatës që po zhvillon në kuadër të lokaleve të 14 Majit, veç shprehjeve të vjetra e ka pajisur edhe me ‘armatime’ të reja si “zorrë qorre”, e të tjera si këto.
Megjithatë, mbetet ende fanatik i disa frazave që kanë mbizotëruar edhe në fjalimet e tij gjatë fushatave të mëparshme.
Para parlamentareve të 2021-shit, në një takim në Belsh, do të shprehej: “Premtojnë si Sudja (i referohet opozitës), si Vehbiu, si Xhaferri. Ata që bëjnë të tilla premtime, N’oc Rrokun do u japin, bilës këtë personazh ku ta gjesh”.
Krahasimin e kundërshtareve politikë me Suden e piramidave e ka rikthyer, e bashkë me të edhe “N’oc Rrokun” e famshëm, për artikulimin e të cilit ka marrë kritika jo të pakta.
Nga Tropoja, disa ditë më parë, kumtoi: “No’c Rrokun (opozita) kanë bërë në Tropojë”…
Ndërsa nga Kavaja artikuloi: “Të dali njëri dhe të më thojë një bashki, dhe të më thojë që e ke gabim, se në vitin 1994 ne kemi pasur atë bashkinë e atje dhe shihe ca keni bërë… N’oc Rrokun”.
Nga Elbasani deklaroi: “Ky Luçi më kujton Lulin. Të jesh dhe me bosh se Luli nuk e di d.m.th. Më thoni një gjë që bënë ata? N’oc Rrokun. Vetëm sherrin ju ka pa Shqipëria atyre”.
Rasti i fundit ishte këtë të Shtunë nga Përmeti. “Si do merrni ju njerëz që nuk mbushin e t’ju jepni bashkinë këtu. Shifni e bëni. Ballaban Berat ne do ta bëjmë, por jo falas. Po e doni falas, merrni ata të tjerët dhe të merrni jo rrugët, por N’oc Rrokun pastaj”, iu drejtua Rama të pranishmëve.
Në ligjërimin politik, “N’oc Rroku” doli fillimisht nga goja e Edi Ramës, megjithatë, duket se kreu i qeverisë nuk qe i vetmi që i ka pëlqyer. Pas Ramës, Veliaj ka shfaqur po ashtu një simpati për “N’oc Rrokun”.
I njëjti Erion Veliaj i cili u shpreh i indinjuar për posterin e Belind Këlliçit me gishtat e mesit drejtuar korrupsionit në Bashkinë e Tiranës.
“Disa prej tyre nxjerrin edhe gishtin e mesit, kur kërkojnë të votohen nga populli. Turp i madh”, dënoi ai veprimin e kundërshtarit politik.
Më tej, do të deklaronte: “Kështu thoshte dhe Saliu në ‘97 dhe e pamë çfarë fituam të gjithë. N’oc Rrokun fituam të gjithë”.
Në vitin 2019, edhe atëherë kohë fushate, pas ligjërimeve të shpeshta dhe plot patos të kryeministrit për “N’oc Rrokun”, ish-akademiku dhe studiuesi Edmond Tupja do të shpjegonte se këto dy fjalë “kanë një kuptim të figurshëm tejet vulgar: Ato shënjojnë organet gjinore të mashkullit”.
