Cristiano Ronaldo ka deklaruar shumë herë se është ai futbollisti më i mirë në historinë e futbollit. Angel Di Maria, shoku i tij te Real Madrid, i përgjigjet kështu tezës së futbollistit portugez që aktualisht luan në Arabinë Saudite në moshën 40-vjeçare.

Fjalët e argjentinasit risillen nga portali “Infobae”:

Nuk më habit aspak. Kam kaluar katër vjet me të dhe gjithmonë e kam njohur kështu. Cristiano gjithmonë ka bërë deklarata të tilla, ai gjithmonë është përpjekur të jetë më i miri. Megjithatë, ka lindur në një epokë të komplikuar për të, sepse pikërisht në ato vite ka ardhur një lojtar tjetër, i cili dukej se ishte i prekur nga shkopi magjik. Shifrat flasin qartë, njëri ka fituar tetë Topa të Artë, tjetri pesë. Diferenca është e pafundtë mes tij dhe Leo Messit”.

Pastaj, është Botërori, që përfaqëson një tjetër distancë domethënëse, pa llogaritur edhe dy Kupa të Amerikës. Ndryshimet janë shumë, vërtetë shumë. E pastaj, mjafton të shikosh ndeshjet për të kuptuar. Shihet në çdo minutë të lojës: luan me natyrshmërinë e dikujt që duket se është në oborrin e shtëpisë, shënon gjithmonë në të njëjtën mënyrë dhe vazhdon ta bëjë. Janë 18-20 vjet që mban këto nivele. Të gjithë thonë: “Po, tani dihet çfarë do të bëjë”, e megjithatë vijohet në përpjekje për ta ndaluar. Ai e bën gjithsesi, dhe do të vazhdojë ta bëjë edhe në moshën 40-vjeçare, me të zakonshmen tiki-taka. Por Cristiano është i bërë kështu, ka folur gjithmonë në këtë mënyrë, ka qenë gjithmonë i njëjti. Për mua, Leo Messi është futbollisti më i mirë në botë dhe pa dyshim më i madhi në histori”.

Përgatiti: Dardan MITROVICA