Sali Berisha është votëbesuar në krye të Partisë Demokratike nga delegatët e PD.
Rezultatin e votimit e zbardhi sekretari për çështjet ligjore në PD, Ivi Kaso, në përfundim të procesit të numërimit.
“Procesi u mbyll ashtu siç edhe patët mundësi ta ndiqnit në mënyrë transparente dhe të drejtpërdrejtë. Në përfundim të procesit të numërimit është hartuar procesverbali përfundimtar dhe përmbledhës i këtij procesi, i cili përmban këto shifra. Numri i votuesve sipas listës së zgjedhësve, votuesve që u identifikuan që ishin në sallë, ishte 1203. Rezulton se numri i votuesve që kanë votuar është 1000, sa është edhe numri i fletëve të votimit që u gjetën në 6 kutitë e votimit. Numri i votave të vlefshme është 993, 7 vota të pavlefshme. Ndarja e votave është si më poshtë, kanë votuar pro 938 delegatë, kanë votuar kundër 55 delegatë. Në bazë të nenit 46 pika 9 e Statutit të Partisë Demokratike të Shqipërisë, rezulton se Sali Berisha është rikonfirmuar në krye të partisë”, tha shkurtimisht Kaso për mediat.
Votimi për votëbesimin e Berishës ishte një ndër pikat e rendit të ditës së kuvendit të PD, mbajtur më herët gjatë kësaj të shtune. Në kuvendin e 11 Dhjetorit 2021 zhvilluar në “Air Albania”, delegatët votuan propozimin që nëse kryetari i partisë humb zgjedhjet lokale, atëherë ai duhet të votëbesohet.
Konfirmimi i Berishës ishte një rezultat i pritshëm. Gjatë fjalës së mbajtur në foltoren e kuvendit të partisë, kryedemokrati u bëri apel qytetarëve ti bashkohen opozitës në nisjen e “mosbindjes civile”, që sipas burimeve pranë PD-së pritet të përshkallëzohet nga Janari duke pasuar aksionin e deputetëve demokratë në parlament. Synimi, theksoi ai, është rrëzimi i Edi Ramës dhe qeverisë së tij, që e akuzoi për vendosjen e një forme të reje diktature në vend.
Ndryshe nga kuvendet e mëparshme, këtë të shtunë ishte pjesëmarrëse dhe vajza e kreut të PD-së Argita Berisha, e cila mbajti edhe një fjalim.
Ndërkohë, deputetët e “grupit Bardhi” zgjodhën ta bojkotonin aktivitetin.
Ndërsa ata të partisë vulës lëshuan akuza ndaj kuvendit dhe Berishës.
